香港新浪網 MySinaBlog
« 上一篇 | 下一篇 »
Po Po | 25th Jun 2012 | (03) 中國湖光山色遊, (01) 各地單車遊 | (752 Reads)
2012年6月24日(星期日)

原意為稍後的南澳團 Pretrip, 點解原定100公里變咗得15公里, 但大家又咁開心呢? emotion

上次踩咗沙頭角至大梅沙, 理解咗部份山路及坐車問題, 今日原意睇下西沖至大梅沙及回各口岸問題.  因為係探路, 只預數人, 最後4人出發.  為咗能順利一點, 我地預多咗時間於八點在九龍塘集合, 坐車入南澳/大梅沙.  方案有二.

(1) 坐0840環島線直入南澳, 但官方答案不比單車上.

(2) 坐0815永東入大梅沙踩入南澳, 但官方答案行李倉有位先有得上.

最後, 係現場同環島買飛個阿姐研究完, 趁即開班車有位就立即坐入沙頭角, 早d過關擺好車上去接駁入南澳架車度就ok.  諗住無死 la, 即刻辦, 每人港紙70, 一開車仲諗住瞓番覺, 點知...... emotion

架車開出九龍塘未到隧道就跪低咗, 點算呢 ......emotion

Picture 

:

:

:

等咗廿分鐘, 終於可以換上第二架車.  好彩預早咗40分鐘, 去到沙頭角還有時間預先擺好d車上南澳架駁車.  嚇咗一輪之後, 上車就瞓咗個拎鐘, emotion咁就到南澳.  而且發現人民路總站每兩小時有班車返香港.

我地四個最後落, 司機望下我, 問我地係咪去西沖, 我話係, 問佢點去, 佢話好易, 前面轉右就有路標, 咁我地以為好易la, 因為佢淨係講咗方向, 無講路況...

咁啱Eric架車打唔到氣, 我地就去飲咖啡, 食pizza, 順便問吓單車維修舖係邊.

食完整好車就出發, 點知一路都係長命斜, 踩極都唔完, Eric哥塊面就先變紅emotion, 再變白, 跟住就停車打冷震emotion, 仲話自己要返轉頭, 點算呢! emotion

:

:

:

大家都無可能俾 Eric哥自己走, 咁就齊齊停低抖抖, 再唔掂就最多齊齊走, 擇日重賽. 

抖咗一陣, Eric 哥竟然人有三急, 排完毒之後臉色好轉, 可以繼續上路喎. emotion

原來佢只係之前一晚蒲得太夜, 紅酒雪茄嘆得太多, 又瞓得三粒鐘, 毒素聚積引至失準, 現在回復正常 la.

大家繼續踩上山去西沖, 點解好似踩極都唔完.  係我滿頭大汗時, 點解後面嘅Rita氣都唔喘下, 爬慣龍舟果然唔同.

原來呢條十一公里的南西公路有七公里多係1比20的上坡路, 同台灣玉祥公路差不多, 更長過大帽山好多.  點解頭先個司機無講?

到達西沖了, 換來的是好多個沙灘收費站.   係大陸, 入山又收費, 沙灘又收費, 香港真係幸福得多.  雖然只係拾零蚊, 但拎住架車, 就梗係唔會游水 la.  咁就疊埋心水開飯, 等陣去小梅沙先落沙灘, 因為果度唔收錢.

今日呢個咁特別嘅日子, 咁如意的事梗係唔會發生啦!

:

:

:

食飯在西涌海濱酒樓, 連埋頭先d咖啡pizza每位50蚊人仔.

Picture

有蛋角, 絲瓜同白切雞. 仲有啤酒汽水白飯.

PicturePicturePicture

飲飽食醉, 約下午兩點起行.  但無人肯同我踩返上山, 唯有叫架車返南澳, 一架麵包車可迫到4人4車(1大3摺), 人仔50. [司機來自重慶, 叫小蘇, 人品唔錯.  13534136590] 

走回14公里山路到南澳, 立即起步.  經過水頭等地到達布新立交, 大家都踩得好高興時就聽到 "嘭" 一聲, 又想點呀!!! emotion

:

:

原來Rita架車爆呔.  唔緊要, Ranson識換呔.  點知一睇, 佢爆後呔, Ranson無信心換.  咁就唯有慢慢踩去下一個大鵬鎮睇下有無得換呔.  踩踩下, 見到Rita只係推車, 原來佢怕傷到條 ling, 咁又係.  但既然唔踩, 即係無downside la, 咁叫 Ranson 試下換 la.  Rita 話無士啤呔, 又唔緊要, Ranson 有, 拆下攪下, ok 喎, 但係 ...

:

:

:

yi, 個咀唔同嘅!!! 我地個泵唔啱用喎!!! Rita 有無泵...無.   截停d單車友睇下有無...無.  好!  無問題, 起碼 Rita 知道出車係要有士啤呔同泵, Ranson 成功拆咗後呔.  我起係好樂觀嘅, 咁就齊齊推車去下一站搭車返歸 la.  行咗兩部, yi, 點解唔試下 call 小蘇呢? ...

:

:

:

傾咗一輪, 小蘇車我地返沙頭角關口(250元).  之後 Rita 坐車回九龍塘, 我地坐另一車回粉嶺繼續踩.  點知...

瞓醒我地都到咗九龍塘 ... emotion

唉!  點! 坐車返大圍踩 lor.  落車去顯徑睇單車, 跟住開飯.

又到生昌, 飲飽食醉了, 加上今日諸事不順, 大家都決定踩回大圍散隊了.  我就把車送到紅磡站, 交給Cindy帶往順德繼續踩.

Picture

綜合兩次視察後得出的結果.

(1) 人多適宜落馬州起步, 因為大巴未必俾你上單車, 但單程多了20公里.

(2) 如中途回程, 需預早一點, 因為未必有飛.

(3) 菠蘿山和七姑娘山部份路窄, 要與車同行.  菠蘿山往大梅沙, 旁邊有未完工單車徑.  七姑娘山住西涌, 1:20七公里長斜.

(4) 西涌與大梅沙的沙灘均需收費, 小梅沙唔駛.

理想行程為兩日一夜.

(1) 落馬州>>鹽田巷午飯>>大梅沙>>水頭晚飯>>南澳住宿. (65公里)

(2) 有力的早起來回西涌(多25公里)>>南澳>>大鵬所城>>小梅沙午飯>>明克思>>落馬州.(65公里)


[3]

別到落馬州,到羅湖口岸過關,參考下面的路線吧!

http://www.bikemap.net/route/1482564#lat=22.588906673941&lng=114.235525&zoom=12&maptype=ts_terrain

由羅湖到西涌,只是盤山公路和出入西涌比較陡,都不過幾K罷了,其他的都是上上落落,此線秋天是首選,別忘要到東涌和楊梅坑走一趟啊!楊梅坑盡頭是山路,走上出,有個酒店,可望海景,單車要放在山腰....因為有保安攔車!


[引用] | 作者 Martin | 16th Jul 2012 | [舉報垃圾留言]

[2]

你好, 多謝你的分享. 你意思是落馬州起步後經羅湖是盤山公路嗎? 我踩過鹽田到大梅沙的菠蘿山及南澳入西涌的七姑娘山, 由落馬州到南澳中, 請問還有那些是大斜呢?


[引用] | 作者 po po | 16th Jul 2012 | [舉報垃圾留言]

[1] Nam O Experience

是時候可以分享南澳的經驗了:

落馬州起步? 應是羅湖走盤山公路吧!

一般在粉嶺帝庭軒永東總站上單車, 未出過問題, 當然行李箱要有位囉.....

西涌只在暑期收門票, 由五月開始, 入秋(忘了何時)便可自由出入.......


[引用] | 作者 Martin | 16th Jul 2012 | [舉報垃圾留言]